Cusina de alta classe
Per una volta tanto go voia de parlar de qualcossa de diverso: magnari de lusso.
Gavé voia de spender ben i soldi? Vegnì a Londra, la capital più cara del mondo, andé in un albergo de cinque stele e feve servir sandwich con l’inserto de formigole vive, alevade in coltivassioni speciali. I clienti più sofisticadi ga dito ala Tv che le xe bone, con un gusto pissighin che xe qualcossa de grande.
Sempre in merito a cibi rafinadi, fra un’infinità de programi Tv dedicadi ala culinaria, ghe ne gavemo uno stagional dove che i partecipanti, za coghi de profession ma con aspirassioni grandiose, ga de cimentarse a cusinar su ordinassioni dei esperti in materia sperando de vinser e de diventar coghi dei più rinomadi alberghi de lusso (che gusti!). I finalisti dela competission se trova impegnadi a cusinar lecornie speciali in posti de altissimo prestigio atraverso el mondo dove che i comensali, ossia le più alte personalità dela culinaria internassional, darà el giudissio final sui piati presentadi. E no manca mai qualche italian in queste comissioni giudicatrici. (A questo punto devo agiunger: mi credo de contar qualcossa de novo e invesse chissà quanti de sti programi Tv che gaveré anche voi in Italia.)
In ogni caso, eco qua qualche piato prelibado dove che la carne devi presentarse apena rosolada de fora e cruda sanguinante de dentro per esser definida “cusinada ala perfession”. “Anitra rosta con contorno de polipo lesso adorno de crema ala vaniglia mista a olive nere masinade”. “Piccione al forno con ripieno de ciocolata amara mista a foie de pressemolo, rodeline de finocio e cocumero, con contorno de puré de olive nere sora de carote lessade ma frede contornade de un formagio dolse e cremoso”. “Carne de cervo rosta con contorno de fragole fresche, fruti de mar e puina mista a peperoncini rossi taiadi a fetine (de quei che a magnarli i te fulmina el cervel de tanto picanti che i xe)”. Acostamenti divini! Soto a sbafar!
A questo punto no posso far a meno de pensar che, a vardar i grandi coghi al’opera, no ghe xe gnente de meo de una semplice, sana e gustosa cusina casalinga. E sto ultimo trafileto el xe dedicado ala cara Daniela Biasiol che ne presenta regolarmente ricete dela “nostra” cusina, cussì bone e invitanti.
Silvia L. Sizzi